الوكالة الوطنية للإعلام – مصطفى حمدان: بُكرا متل أي نهار عادي…

أعلن العميد مصطفى حمدان عبر حسابه على “تويتر”: “في ما يتعلق غداً الأربعاء الواقع في ١٤ حزيران ٢٠٢٣:

ردا على العديد والأكثر من الكثير  من الاستفسارات من أهلنا اللبنانيين شو بدو يصير بُكرا… يا أهلنا اللبنانيين ..

بُكرا متل أي نهار عادي بمرّ، بمشاهد السيرك السياسي اللبناني المذهبي والطائفي، وما في شي رح يصير ..

صحيح طلعت الأبواق المرتزقة وزغاليل الإعلام، وغيرن من شمال لليمين ومن الشرق والغرب، ساعة اغتيالات وساعة تفجير سيارات، وساعة ٧ ايار (ما بقى في ٧ايار، وما حدا بدو ياه اساساً ولا بتنعمل) وهيدا لاقى لعبة (قنبلة) قدام بيته، وهيداك مدري شو بدن يعملوا فيه، وانو في موساد على مخابرات ما معروفة مين، هيدا كلو كذب وتلفيقات يا أهلنا اللبنانيين، مع البهارات اليوم المسا انو القوى الأمنية آخدة زاوية وعزل شوارع وغيرها ..

 بُكرا اقعدو على التلفزيونات تفرجوا على لعيبة السيرك من أولهم لآخرهم كلن قشة لفة ..

بُكرا سيرك كبير تفرجوا عليه وانبسطوا فيه وابكوا على حالكن بعدين، والخميس ما متل ما عم يقولوا الكذابين انو يوم آخر ، هودي لنازلين بوكرا مفكرين حالن شي مهم قالولن انتو مهمين، بطلتوا مهمين ما حدا شايفكن، بالزمانات كانت تكلف ملايين الدولارات اذا مش اكتر الانتخابات الرئاسية بلبنان، انتو كلكن بتعرفوا ما حدا عرض عليكم شي لانكم جميعكم قشة لقة بتسووا صفر مكعب..

انتو جزء من لعيبة السيرك، لا يا ريت، انتو يلي بتلعبوا بقلب السيرك، منشان هيك يا أهلنا اللبنانيين ما حدا يخوفكن، ما في شي، الأجهزة جاهزة وجيشنا جاهز، وكل هالشي من ضمن المؤثرات الصوتية والنظرية والهندسية للأدوار لعم يلعبوها بقلب السيرك تبعهم ..

نهار الخميس نهار عادي، روحوا شوفوا كيف بدكن تأمنوا لقمة عيشكم، وشوفوا هيدا الدولار لعم يلعبوا فيه وشوفوا الامور لعم تصير على مستوى المنطقة والعالم”.

=======